政Whats噏：要身體健康　江明熙推七無膳食

想保持健康必須從飲食著手。香港醫療專業人士協會創會主席江明熙話，濫用科技手段嘅工業化糧食生產，既損害環境又不利健康，所以佢打算提倡不經基因改造，不含農藥同化學品，無賀爾蒙無催生激素，亦無殺蟲劑與防腐劑等「七無」嘅可持續膳食，期望大家食得自然兼可持續健康。

驟耳聽來，可持續膳食係近年興起嘅新概念，但江明熙話人類糧食本來就係「七無」，隻係幾十年來農業同養殖都邁向工業化，糧食產量無疑係多咗，但產品質素不斷下降，就連「食雞要有雞味」咁起碼嘅要求亦成奢談，長遠而言亦對健康構成顧慮。

要推廣可持續飲食，佢打算由食肆開始，初期建議餐牌上至少有1道菜色係採用「七無」嘅食材。雖然「七無」食材價格較高，但隻要得到大眾接受，自然會增加供應從而拉低售價，如瑞典推行可持續膳食之初，價錢比一般食材貴咗25%，但半年後隻較工業化食材貴5%。佢又話本地亦有農夫從事「七無」耕作，且注重健康同環保嘅港人亦唔少，因此香港係有條件將可持續膳食普及化。

本文來源：http://hk.on.cc/hk/bkn/cnt/news/20180409/bkn-20180409215246830-0409_00822_001.html