身為玩具迷，邊個唔想成為第二個「古生」，有過萬呎地方畀你display珍藏，就連1/1 Iron Man都放得落……唔好FF了，Mr Cool只得一個，能夠有個小空間，畀小編似模似樣set番個聖鬥士小劇場已經心滿意足了，不過就算有位、有Figure，聖域背景何處尋？本土品牌Legend Studio製作咗一款雅典娜典像，連同底座高約350mm，專誠畀聖鬥士粉絲set場景之用。以大細而論，呢款Figure最啱襯D.D. Panoramation系列，用嚟夾聖衣神話與聖衣神話EX都得，不過擺位上要心花少少心思營造景深。至於造工方面都算OK，起碼女神面容清晰冇走樣，至於深入民心嘅兩大配件，分別係左手嘅大圓盾，以及右手嘅勝利女神都一一實體化，塗裝方面亦「飽歷風霜」，唔會令人覺得失真。留意呢款雕像分為雅典娜主體、左右手與底座四部分，需要玩家自行組裝，雖然組件少，組件之間亦有榫位連接，不過穩固度實在一般，玩家最好都行用膠水痴實才算穩陣。
除了聖鬥士的粉絲，高達迷何嘗不想有場景組合？早前Robot魂便推出了兩套場景Boxset，均以「0079」的太空母艦（White Base）的甲板為題，一款設計成格納庫，另一款係彈射器，既可獨立display，亦可合組起來，甚至乎將多套Boxset連結起嚟，變成完整嘅甲板，襯埋同系嘅高達、雷射大炮、太空坦克與吉姆，就可組裝出高達出發時的經典場面。
本文來源：http://hk.on.cc/hk/bkn/cnt/lifestyle/20171028/bkn-20171028130013299-1028_00982_001.html
